N'ASTURIANU

Pos entamu esti "post" agora pa esgayar una llanza al favor del nuesu bable... Ye una llingua de les mas antigües de la península, y tamos dexandola perdese por culpa de cuatro fartones que nun facen otra cosa que fartase de les perres de los demas.

Ye asina que voy facer una mezcolanza de algunes poesies n'asturianu... espero que vos gusten:

COMU LLENDE DE LA LLUNA

Yo nun tendré enxamás

La perdulce costume

De vete cada nueche

Dir quitando

Tolo que te ñibla,

Y quedate escamplada

Pa les manes sollertes.

Vencer la escuridá

Sería tenete a ti

Rellumante de lluz

Comu llende de lluna.

Yó sólo tengo

Al vértigo apenáu

D’apalpar cada nueche

L’abisu la to ausencia.

(Armonía d’anxélica sirena, Pablo Ardisana)

EL MIO CUARTU

Nes parés del mio cuartu

una murnia volcánica

pinga penes amarielles

y parda indiferencia.

Hai un bermeyu llamparón trespasáu

por quince mil anfileres multicollores

qu’esfelpéyense en frebes de borrina.

Borrina que frañuca,

qu’avienta,

que tracamúndiase nuna congoxa de muerte infinita.

(Camín del cumal fonderu, Manuel Asur)

PANICEIROS

Conozo un país onde al mundu–y llamen

Zarréu Grandiella Picu la Mouta Paniceiros

Un mundu que perdéu l’aldu los caminos

Xerusalén llevantao na palma la mano d’un nenu

Un mundu que yera altu luminosu esbeltu

Naciente y fonte y vocación de ríu

Onde los homes callen y el silenciu ye renuncia

Onde escaecimos el ser Onde claudicamos

Un país onde la casa cai cai l’horru la ponte

El molín la ilesia l’home tamién cai

Onde la mirada yera pura cenciella

la xaceda que dexara la nube en cielu

Onde namás nos queda la memoria

corrompida de la infancia

La nuesa soledá

L’abandonu de nueso

(D’el llibru vieyu, Xuan Bello)

Llucha escontra la nuesa soledá, l’abandonu de nueso.
Po’la nuesa llingua, nun l’olvides, nun te calles, fala.