POLÉMICA NA XUNTA XENERAL POL USU DEL ASTURIANU

La sesión d'ayeri na Xunta Xeneral del Principáu vivió un debate encesu alredor del asturianu que prendió cuando Javier Valledor, Conseyeru d'Esteriores y Xusticia, entamó una de les sos intervenciones n'asturianu. La quexa de la diputada popular Inmaculada Álvarez, que dixo que nun entendía al conseyeru, armó un espolín que duró tola sesión.

La engarradiella verbal y llingüística entamó cuando Javier Valledor xubió al escañu d'oradores pa presentar los conteníos del plan cuatrienal de cooperación d'Asturies. Por primer vegada en tola llexislatura, Valledor decidió emplegar l'asturianu nel Parlamentu aprovechando que se celebraba la Selmana de les Lletres. Valledor dirixóse a les sos señoríes nun asturianu ensin barroquismos nin complicaciones, pero cuando nun llevaba lleides dos fueyes de la so intervención la diputada popular Inmaculada Álvarez mandó a la presidenta de la Xunta María Jesús Álvarez interrumpir al Conseyeru pa remembrá-y qu'ella como falante de castellano, nun entendía lo que-y taben diciendo. Anque Valledor tenía nesi momentu la posibilidá d'acoyese a la Llei d'Usu pa siguir la so intervención n'asturianu, dexó la decisión en manes de la mesa de la Xunta "por nun facer del asturianu un asuntu de confrontación", encamentándo-y la mesa siguir en castellano la so intervención, non ensin que se produxere un intercambiu d'opiniones nel que Valledor llamentó que'l Parlamentu Asturianu nun dispusiere d'un serviciu de traducción simultánea.

L'episodiu con Valledor repercutió en delles ondes espansives a lo llargo de la sesión, y asina la diputada d'Izquierda Xunida Diana Camafeita sorrayó otra vuelta la pitición de serviciu de traducción na cámara, mientres que la tamién diputada d'IX Paloma Uría volvió a usar l'asturianu nuna intervención na que faló sobre los Picos d'Europa, armándose otra vuelta una discusión colos escaños del PP, anque esta vegada Uría pudo rematar la so intervención. El diputáu socialista Faustino Álvarez prebó tamién a falar n'asturianu, pero'l so rexistru idiomáticu merecióla chancia del popular Joaquín Aréstegui, que-y dixo que "Escuchando esta intervención en "faustinés", cada vegada somos más partidarios de que la llingua asturiana entre a la Universidá".

Ello ye que d'otra manera la Xunta Xeneral votó por unanimidá una moción conxunta de PSOE y IX empobinada al Conseyu de Gobiernu pidiendo la implantación de la titulación de Filoloxía Asturiana na Universidá d'Uviéu. Los diputaos del grupu popular votaron al favor, pero llamentaron que nun-yos presentaren la propuesta primero pa que tolos grupos la pudieren suscribir. Aréstegui resumió'l sentir del PP y la so interpretación de los estudios sociollingüísticos del profesor Llera Ramo al dicir que "les encuestes demuestren que los asturianos nun quieren un procesu d'inmersión llingüística y que tampoco quieren l'asturianu n'ámbitos oficiales, anque sí tan esmolecíos pola conservación de la llingua".

Publicado el 7 de Mayo de 2005 a las 15.16 en wallace17.spaces.live.com.